ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ ​ໄດ້​ຈັດ​​ປາຖະກະຖາ​ເຊື່​ອມຊຶມ ​ເອກະສານ​ສຳຄັນ​ຂອງ​ຊາດ

0
309


ໃນ​ວັນ​ທີ 18 ກໍລະກົດ 2019 ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ​ໄດ້​ຈັດ​​ປາຖະກະຖາ​ເຊື່​ອມຊຶມ​ເອກະສານ​ສຳຄັນ​ຂອງ​ຊາດ​ຄື ມະຕິ​ກອງ​ປະຊຸມຄົບ​ຄະນະ​ຄັ້ງ​ທີ 8 ຂອງ​ຄະນະ​ບໍລິຫານ​ງານ​ສູນ​ກາງ​ພັກສະ​ໄໝ X ກົດໝາຍວ່າ​ດ້ວຍ​ສຳນັກງານ​ຜູ້​ຕາງໜ້າ​ແຫ່ງ ສປປ ລາວ ປະຈຳ​ຕ່າງປະ​ເທດ ວັນ​ຄ້າຍ​ວັນ​ເກີດປະທານ ສຸພາ​ນຸວົງ ​ແລະ ​ແຜນ​ແມ່​ບົດ​ວ່າ​ດ້ວຍ​ການ​ສ້າງ​ຄູ່​ຮ່ວມ​ຊາ​ຕາ​ກຳລາວ-​ຈີນ ​ໃຫ້ກຽດປາຖະກະຖາ​ໂດຍສະຫາຍ ນາງ ສູນ​ທອນ ​ໄຊ​ຍະ​ຈັກ ກຳມະການ​ສູນ​ກາງ​ພັກ ​ເລຂາ​ຄະນະ​ພັກ ຫົວໜ້າຄະນະ​ພົວພັນ​ຕ່າ​ງປະ​ເທດ​ສູນ​ກາງ​ພັກ ມີ​ຄະນະ​ພັກ ຄະນະ​ກົມ ​ພ້ອມ​ດ້ວຍ​ພະນັກງານ​ພາຍ​ໃນ ຄະນະ​ພົວພັນ​ຕ່າງປະ​ເທດ​ສູນ​ກາງ​ພັກ​ເຂົ້າ​ຮ່ວມ.

​ໃນ​ໂອກາດ​ນີ້ ສະຫາຍ ນາງ ສູນ​ທອນ ​​ໄດ້​ຍົກ​​ໃຫ້​ເຫັນ​ເນື້ອ​ໃນ​ສຳຄັນຂອງ​ມະຕິ​ຂອງ​ສູນ​ກາງ​ພັກຄັ້ງ​ທີ 8 ກ່ຽວກັບ​ການ​ແກ້​ໄຂ​ຄວາມ​ຫຍຸ້ງຍາກທາງ​ດ້ານ​ເສດຖະກິດ​ມະຫາ​ພາກຕິດ​ພັນ​ກັບ​ການ​ຜັນ​ຂະຫຍາຍມະຕິ​ກອງ​ປະຊຸມ​ສູນ​ກາງ​ຄົບ​ຄະນະຄັ້ງ​ທີ 7 ສະ​ໄໝທີ X ຂອງ​ພັກ ຈາກ​ນັ້ນ ສະຫາຍ ນາງ ​ສູນ​ທອນ ​ໄດ້​ສືບ​ຕໍ່​ເຜີຍ​ແຜ່​ເນື້ອ​ໃນ​ຂອງ​ກົດໝາຍວ່າ​ດ້ວຍ​ສຳນັກງານ​ຜູ້​ຕ່າງໜ້າ ສປປ ລາວ ປະຈຳ​ຢູ່​ຕ່າງປະ​ເທດ ພ້ອມ​​ຫວນ​ຄື​ນຊີວິດການ​ເຄື່ອນ​ໄຫວ​ປະຕິວັດ ຄຸນງາມຄວາມດີ ​ແລະ ຜົນງານ​ຂອງ​ປະທານ ສຸພາ​ນຸວົງ ຜູ້ນຳ​ທີ່​ດີ​ເດັ່ນ​ຂອງ​ປະຊາຊົນ​ລາວ​ໃນ​ການ​ປະກອບສ່ວນ​ສ້າງ​ກ້ອນ​ກຳລັງ​ສາມັກ​ຄີ​ເປັນອັນໜຶ່ງອັນ​ດຽວໃນ​ພາລະກິດ​ປະຕິວັດ​ຂອງ​ລາວກໍ​ຄື​ ແນວ​ໂຮມ​ເອກະ​ພາບ​ແຫ່ງ​ຊາດ ​ຕະຫຼອດ​ໄລຍະ​ແຫ່ງ​ການ​ຕໍ່​ສູ່ ເພື່ອ​ຍາດ​ເອົາ​ເອກະລາດ​ແຫ່ງ​ຊາດກໍ​ຄືໃນ​ຂະ​ບວນ​ການ​ປົກປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ​ໃນ​ແຕ່ລະ​ໄລຍະ.

ໃນ​ຕອນ​ທ້າຍ ສະຫາຍ ນາງ ສູນ​ທອນ ​ໄຊ​ຍະ​ຈັກ ​ໄດ້​ເຜີຍ​ແຜ່​​ເອກະສານກ່ຽວກັບ​​ແມ່​ບົດວ່າ​ດ້ວຍ​ການ​ສ້າງ​ຄູ່​ຮ່ວມ​ຊາຕາກຳ​ລາວ-​ຈີນ ລະຫວ່າງພັກ​ປະຊາຊົນ ປະຕິວັດ​ລາວກັບ​ພັກ​ກອມ​ມູນິດ​ຈີນ ​ໂດຍ​ໄດ້ຍົກ​ໃຫ້​ເຫັນ​ເຖິງ​ເປົ້າໝາຍລວມ ຫຼັກການ ​ແລະ ​ເນື້ອ​ໃນ​ຂອງ​ແຜນ​ແມ່​ບົດ​ຊຶ່ງກວມ​ເອົາ​ການ​ຮ່ວມ​ມື​ດ້ານ​ການ​ເມືອງ ​ເສດຖະກິດ ​ການ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ ການ​ພົວພັນ​ດ້ານ​ວັດທະນະທຳ ການ​ໄປມາຫາສູ່​ລະຫວ່າງ​ປະຊາຊົນ ​ແລະ ການ​ຮ່ວມ​ມື​ດ້ານ​ສິ່ງ​ແວດ​ລ້ອມ ​ແລະ ການ​ພັດທະນາ​ແບບ​ຍືນ​ຍົງ.

ໂດຍ: ສະຫະລັດ ວອນທິວົງໄຊ

ຂ່າວຈາກ ລາວໂພສຕ໌



LEAVE A REPLY

Please enter your comment!
Please enter your name here