ຂ່າວດີ ໂຮງໝໍເຊດຖາທິຣາດ ສາມາດຜ່າຕັດໜິ້ວຖົງນ້ຳບີ ແລະ ຕ່ອມລູກໝາກຜ່ານທໍ່ ໄດ້ແລ້ວ

0
212


ປັດ­ຈຸ­ບັນ ທີມ​ງານ​ແພດ​ຜ່າ­ຕັດ​ຂອງ​ໂຮງ­ໝໍ​ເຊດ​ຖາ​ທິ​ຣາດ ໄດ້​ມີ​ການ​ພັດ­ທະ­ນາ​ສີ­ມື​ດີ​ຂຶ້ນ ແລະ ສາ­ມາດ​ທຳ​ການ­ຜ່າ­ຕັດ ດ້ວຍ​ວິ­ທີ​ການ​ຜ່ານ​ທໍ່​ດ້ວຍ​ຕົນ​ເອງ​ໄດ້​ຢ່າງ​ຊັດ​ເຈນ ແລະ ມີ​ຄວາມ​ແນ່­ນອນ ນັບ​ແຕ່​ວັນ​ທີ 29 ມີ­ນາ 2019 ມາ​ຮອດ​ປັດ­ຈຸ­ບັນ ໂຮງ­ໝໍ​ເຊດ​ຖາ​ທິ​ຣາດ ມີ​ຜູ້​ມາ​ໃຊ້​ບໍ​ລິ​ການ­ຜ່າ­ຕັດ​ໜິ້ວ​ຖົງ​ນ້ຳ­ບີ​ດ້ວຍ​ວິ­ທີ​ການ​ຜ່ານ​ທໍ່ 59 ກໍ­ລະ­ນີ ແລະ ຜ່າ­ຕັດ​ຕ່ອມ​ລູກ​ໝາກ​ດ້ວຍ​ວິ­ທີ​ການ​ຜ່ານ​ທໍ່ 11 ກໍ­ລະ­ນີ ເຊິ່ງ​ຈຳ­ນວນ​ຜູ້​ທີ່​ມາ​ໃຊ້​ບໍ­ລິ­ການ​ດັ່ງ­ກ່າວ​ນັ້ນ ແມ່ນ​ມີ​ຄວາມ​ປອດ​ໄພ 100% ໝົດ​ທຸກ​ຄົນ.

ທ່ານ ບຸນ​ມີ ສົມ​ສະ​ໜຸດ ຄະ­ນະ​ອຳ­ນວຍ​ການ​ໂຮງ­ໝໍ​ເຊດ​ຖາ​ທິ​ຣາດ ໃຫ້​ຮູ້​ວ່າ: ໜິ້ວ​ຖົງ​ນ້ຳ­ບີ​ຄື​ກ້ອນ​ໜິ້ວ​ຂະ­ໜາດ​ນ້ອຍ​ທີ່​ເກີດ​ຂຶ້ນ​ໃນ​ຖົງ​ນ້ຳ­ບີ ມັກ​ຈະ​ເກີດ​ຂຶ້ນ​ເມື່ອ​ສ່ວນ​ປະ­ກອບ​ຂອງ​ນ້ຳ­ບີ ໂດຍ​ສະ­ເພາະ ຄໍ​ເລ​ສ​ເຕຣ​ອລ ແລະ ບີ​ລີ​ຣູ​ບິນ ຕົກ​ຕະ​ກອນ​ຈັບ​ຕົວ​ກັນ​ເປັນ​ກ້ອນ ໂດຍ​ກ້ອນ​ດັ່ງ­ກ່າວ ອາດ​ເປັນ​ກ້ອນ​ນ້ອຍ​ຫຼາຍ​ກ້ອນ ເປັນ​ກ້ອນ​ໃຫຍ່​ກ້ອນ​ດຽວ ຫຼື ຫຼາຍ​ກ້ອນ ສ່ວນ​ໃຫຍ່​ມັກ​ບໍ່​ມີ​ອາ­ການ ແລະ ອາດ​ບໍ່​ຈຳ­ເປັນ​ປິ່ນ­ປົວ ເຖິງ​ຢ່າງ­ໃດ​ກໍ​ຕາມ ກ້ອນ​ໜິ້ວ​ດັ່ງ­ກ່າວ​ຕິດ​ຄ້າງ ຫຼື ອັດ​ຕັນ​ທາງ​ເດີນ​ຂອງ​ນ້ຳ­ບີ ຈະ​ພາ­ໃຫ້​ມີ​ອາ­ການ​ເຈັບ­ທ້ອງ​ຢ່າງ​ຮຸນ​ແຮງ​ກະ­ທັນ­ຫັນ ທີ່​ທາງ​ການ​ແພດ​ເອີ້ນ​ກັນ​ວ່າ Biliary Colic ຫຼື ມີ​ການ​ອັກ­ເສບ​ຖົງ​ນ້ຳ­ບີ​ຍ້ອນ​ໜິ້ວ ເຊິ່ງ​ບາງ​ກໍ­ລະ­ນີ​ແພດ​ຕ້ອງ​ແນະ­ນຳ​ການ​ປິ່ນ­ປົວ​ດ້ວຍ​ການ­ຜ່າ­ຕັດ ໂດຍ​ທົ່ວ​ໄປ​ແລ້ວ ການ​ປິ່ນ​ປົ່ວ​ໜິ້ວ​ຖົງ​ນ້ຳ­ບີ​ສ່ວນ​ໃຫຍ່ ແມ່ນ​ມີ​ວິ­ທີ​ການ­ຜ່າ­ຕັດ​ຢູ່ 2 ວິ­ທີ​ທີ່​ເປັນ​ມາດ­ຕະ­ຖານ ແລະ ເປັນ​ທີ່​ຍອມ­ຮັບ​ໃນ​ທົ່ວ​ໂລກ ຄື: ການ­ຜ່າ­ຕັດ​ໜິ້ວ​ຖົງ​ນ້ຳ­ບີ​ແບບ​ຊ່ອງ​ກ້ອງ ເຊິ່ງ​ເປັນ​ວິ­ທີ​ການ­ຜ່າ­ຕັດ​ແບບ​ໃໝ່ ທີ່​ໃຫ້​ຜົນ​ເໝືອນ​ກັບ​ການ­ຜ່າ­ຕັດ​ເປີດ​ຜົ້ງ​ທ້ອງ ແລະ ເປັນ​ວິ­ທີ​ທີ່​ກຳ­ລັງ​ນິ­ຍົມ​ໃຊ້​ຫຼາຍ ເພາະ​ເປັນ​ການ​ຫຼຸດ​ຄ່າ​ໃຊ້​ຈ່າຍ ຫຼຸດ​ຈຳ­ນວນ​ມື້​ນອນ​ໂຮງ­ໝໍ ຫຼຸດ​ອັດ­ຕາ​ສ່ຽງ​ຕໍ່​ການ​ຕິດ­ເຊື້ອ ຫຼຸດ​ຈຳ­ນວນ​ທີມ​ງານ​ຜ່າ­ຕັດ ແລະ ຍັງ​ມີ​ຮອຍ​ແຜ​ຈາກ​ການ­ຜ່າ­ຕັດ​ໜ້ອຍ ການ­ຜ່າ­ຕັດ​ໜິ້ວ​ຖົງ​ນ້ຳ­ບີ​ແບບ​ເປີດ​ຜົ້ງ​ທ້ອງ​ສ່ວນ​ໃຫຍ່​ໃນ​ປັດ​ຈຸ​ບັດ ແພດ​ຜ່າ­ຕັດ​ມັກ​ທຳ​ການ­ຜ່າ­ຕັດ​ດ້ວຍ​ວິ­ທີ​ນີ້ ກໍ­ລະ­ນີ​ທີ່​ມີ​ໜິ້ວ​ຂະ­ໜາດ​ໃຫຍ່ ມີ​ການ​ອັກ­ເສບ​ຖົງ​ນ້ຳ­ບີ​ທີ່​ຮຸນ​ແຮງ ແລະ ແພດ​ເຫັນ​ວ່າ​ຈະ​ມີ​ຄວາມ​ສ່ຽງ​ອື່ນໆ​ຕາມ​ມາ.

ໂຮງ­ໝໍ​ເຊດ​ຖາ​ທິ​ຣາດ ໄດ້​ຮ່ວມ​ມື​ທາງ​ດ້ານ​ວິ­ຊາ​ການ​ດ້ານ​ສັນ​ລະ​ຍາ​ສາດ ການ­ຜ່າ­ຕັດ​ໜິ້ວ​ຖົງ​ນ້ຳ­ບີ​ຜ່ານ​ທໍ່ ແລະ ຜ່າ­ຕັດ​ຕ່ອມ​ລູກ​ໝາກ​ຜ່ານ​ທໍ່​ກັບ​ໂຮງ­ໝໍ​ສົມ­ເດັດ​ພະ­ຍຸ​ພະ​ຣາດ ເມືອງ​ທ່າ​ບໍ່ ແຂວງ​ໜອງ​ຄາຍ ຣາ​ຊະ​ອາ­ນາ­ຈັກ​ໄທ ເລີ່ມ​ຈັດ​ຕັ້ງ​ປະ­ຕິ­ບັດ​ປີ 2018 ເປັນ­ຕົ້ນ​ມາ ການ​ຮ່ວມ​ມື​ກຳ­ນົດ​ເວ­ລາ 4 ປີ ໂດຍ​ໂຮງ­ໝໍ​ເຊດ​ຖາ​ທິ​ຣາດ ໄດ້​ສົ່ງ​ທີມ​ງານ​ແພດ​ຜ່າ­ຕັດ​ໄປ​ອົບ­ຮົມ ແລະ ປະ­ຕິ­ບັດ​ຕົວ​ຈິງ​ຢູ່​ໂຮງ­ໝໍ​ສົມ­ເດັດ​ພະ­ຍຸ​ພະ​ຣາດ ແລະ ທີມ​ແພດ​ຜ່າ­ຕັດ​ໂຮງ­ໝໍ​ສົມ­ເດັດ​ພະ­ຍຸ​ພະ​ຣາດ ໄດ້​ນຳ­ພາ​ປະ­ຕິ­ບັດ​ຕົວ​ຈິງ​ຢູ່​ໂຮງ­ໝໍ​ເຊດ​ຖາ​ທິ​ຣາດ ນຳ​ໂດຍ​ທ່ານ ວັດ­ທະ­ນາ ພາ­ສີ​ລິ ຜູ້­ອຳ­ນວຍ­ການ​ໂຮງ­ໝໍ​ສົມ­ເດັດ​ພະ­ຍຸ​ພະ​ຣາດ.

ຂໍຂອບໃຈ ພາບແລະເນື້ອຫາໂດຍ ຫນັງສືພິມວຽງຈັນໃຫມ່



LEAVE A REPLY

Please enter your comment!
Please enter your name here