ຈະກຳນົດມາດຕະຖານການເພີ່ມສານອາຫານໃນລາວ

0
230


ກອງ​ປະ­ຊຸມ​ປຶກ­ສາ​ຫາ­ລື​ດ້ານ​ວິ­ຊາ​ການ ມາດ­ຕະ­ຖານ​ການ​ເພີ່ມ​ວິ­ຕາ­ມິນ​ແຮ່​ທາດ​ໃສ່​ອາ­ຫານ​ຢູ່​ລາວ ຈັດ​ຂຶ້ນ​ວັນ​ທີ 3-4 ກໍ­ລະ­ກົດ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຮ່ວມ​ຂອງ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ ຣາ​ກັນ ທອງ​ກູ​ລ ຮອງ​ຜູ້­ອຳ­ນວຍ­ການ ແລະ ຕາງ­ໜ້າ​ອົງ­ການ​ອາ­ຫານ​ໂລກ ແຫ່ງ​ສະ­ຫະ​ປະ­ຊາ​ຊາດ​ປະ­ຈຳ​ລາວ ມີ​ຜູ້­ຕາງ­ໜ້າ​ບັນ­ດາ​ກະ­ຊວງ ແລະ ຂະ­ແໜງ­ການ​ທີ່​ກ່ຽວ­ຂ້ອງ​ເຂົ້າ​ຮ່ວມ.

ທ່ານ ພູ­ທອນ ເມືອງ​ປາກ ກ່າວ​ວ່າ: ໄລ­ຍະ​ຜ່ານ​ມາ​ລັດ­ຖະ­ບານ​ປະ­ສົບ​ຜົນ­ສຳ­ເລັດ ໃນ​ການ­ຈັດ­ຕັ້ງ​ປະ­ຕິ­ບັດ ໂດຍ​ສະ­ເພາະ ການ​ສົ່ງ­ເສີມ​ການ​ນຳ​ໃຊ້​ເກືອ​ເສີມ​ທາດ​ໄອ​ໂອ​ດີນ ເພື່ອ​ປ້ອງ​ກັນ​ພາ­ວະ​ການ​ຂາດ​ສານ​ອາ­ຫານ​ໄອ​ໂອ​ດີນ ນອກ​ນີ້ ໂອ­ກາດ​ໃນ​ການ​ທີ່​ຈະ​ເພີ່ມ​ສານ​ອາ­ຫານ​ໃນ​ອາ­ຫານ​ອື່ນໆ​ເຊັ່ນ: ເຂົ້າ ນ້ຳ­ມັນ ອາ­ຫານ​ຈຳ­ພວກ​ເສັ້ນ ຊອສ​ປຸງ​ແຕ່ງ­ອາ­ຫານ ແລະ ຜະ­ລິດ​ຕະ​ພັນ​ຈາກ​ນົມ ແມ່ນ​ຈະ​ຕ້ອງ​ຄຳ­ນຶງ​ເຖິງ​ເຊັ່ນ​ດຽວ​ກັນ ດັ່ງ­ນັ້ນ ພວກ​ເຮົາ​ຈຶ່ງ​ຕ້ອງ­ການ​ສະ­ໜັບ­ສະ­ໜູນ​ຈາກ​ຜູ້​ມີ​ສ່ວນ​ຮ່ວມ​ທັງ​ໝົດ ໃນ​ການ​ແກ້​ໄຂ​ບັນ­ຫາ​ດັ່ງ­ກ່າວ ກອງ​ປະ­ຊຸມ​ວິ­ຊາ​ການ​ຄັ້ງ​ນີ້ ເປັນ​ບາດ­ກ້າວ​ໜຶ່ງ​ທີ່​ສຳ­ຄັນ ເພາະ​ເປັນ​ຂັ້ນ​ຕອນ​ທຳ​ອິດ​ໃນ​ການ​ກຳ­ນົດ​ມາດ­ຕະ­ຖານ​ການ​ເພີ່ມ​ສານ​ອາ­ຫານ​ໃນ​ປະ­ເທດ​ລາວ.

ທ່ານ ຣາ​ກັນ ທອງ​ກູ​ລ ກ່າວ​ຕື່ມ​ວ່າ: ການ​ເພີ່ມ​ສານ​ອາ­ຫານ​ແມ່ນ​ໜຶ່ງ​ໃນ​ວິ­ທີ​ທີ່​ມີ​ປະ­ສິດ­ທິ­ພາບ​ຫຼາຍ​ທີ່​ສຸດ ເພື່ອ​ປັບ­ປຸງ​ການ​ເຂົ້າ​ເຖິງ​ຈຸ​ລີນ​ຊີ​ຂອງ​ປະ­ຊາ­ກອນ​ລາວ​ທົ່ວ​ປະ­ເທດ ສຳ­ຄັນ​ທີ່​ສຸດ​ແມ່ນ​ໄວ​ໜຸ່ມ​ຍິງ ແລະ ແມ່­ຍິງ​ໃນ​ໄວ​ຈະ­ເລີນ​ພັນ​ທີ່​ມີ​ຄວາມ​ສ່ຽງ​ຫຼາຍ​ທີ່​ສຸດ ເຊິ່ງ​ໃນ​ການ​ເລີ່ມ​ຕົ້ນ​ເສັ້ນ­ທາງ​ທີ່​ຍາວ​ໄກ​ຕໍ່​ການ​ເພີ່ມ​ສານ​ອາ­ຫານ​ໃນ​ລາວ ຂັ້ນ​ຕອນ​ທຳ​ອິດ​ຂອງ​ພວກ​ເຮົາ ຄື​ການ​ທົບ​ທວນ​ມາດ­ຕະ­ຖານ​ແຫ່ງ​ຊາດ ແລະ ຮຽນ​ຮູ້​ຈາກ​ປະ­ສົບ​ການ​ຂອງ​ບັນ­ດາ​ປະ­ເທດ​ໃກ້​ຄຽງ ດ້ວຍ​ວິ­ທີ​ນີ້ ພວກ​ເຮົາ​ຈະ​ສາ­ມາດ​ກະ­ກຽມ​ການ​ສ້າງ​ກົດ­ໝາຍ ແລະ ລະ­ບຽບ​ການ​ທີ່​ເໝາະ​ສົມ​ໃນ​ການ​ເພີ່ມ​ສານ​ອາ­ຫານ ໃນ​ທີ່​ສຸດ​ຄວາມ​ສຳ­ເລັດ​ນີ້ ກໍ​ຈະ​ປະ­ກອບ­ສ່ວນ​ເຂົ້າ​ໃນ​ວຽກ​ພັດ­ທະ­ນາ ໂດຍ​ສະ­ເພາະ ການ​ປັບ­ປຸງ​ສຸ­ຂະ­ພາບ​ຂອງ​ປະ­ຊາ­ຊົນ​ໃນ​ລາວ​ຢ່າງ​ມີ​ຄວາມ​ໝັ້ນ­ຄົງ ແລະ ຍືນ​ຍົງ.

ຂໍຂອບໃຈ ພາບແລະເນື່ອຫາໂດຍ ຫນັງສືພິມວຽງຈັນໃຫມ່



LEAVE A REPLY

Please enter your comment!
Please enter your name here