30 C
Vientiane
ວັນພະຫັດ, ເດືອນມັງກອນ 28, 2021

ທ່ານທອງລຸນ ສີສຸລິດ ກ່າວຄໍາປາໄສໃນພິທີເປີດງານວາງສະແດງສິນຄ້າຈີນ-ອາຊຽນຄັ້ງທີ 17 ທີ່ນະຄອນໜານໜິງ.

- Advertisement -
- Advertisement -

ພະນະທ່ານທອງລຸນ ສີສຸລິດ, ນາຍົກລັດຖະມົນຕີແຫ່ງສປປລາວ,ໃນຖານະທີ່ ສປປ ລາວ ເປັນປະເທດເຈົ້າພາບຮ່ວມກັບລັດຖະບານ ແຫ່ງ ສາທາລະນະລັດ ປະຊາຊົນ ຈີນ, ໄດ້ເປັນກຽດກ່າວຄໍາປາໄສ (ແບບບັນທຶກວິດິໂອໄວ້ລ່ວງໜ້າ) ໃນພິທີເປີດງານວາງສະແດງສິນຄ້າຈີນ-ອາຊຽນຄັ້ງທີ 17 ແລະ ກອງປະຊຸມສຸດຍອດການຄ້າ-ການລົງທຶນ ຈີນ-ອາຊຽນ ຄັ້ງທີ 17 ທີ່ນະຄອນໜານໜິງ, ແຂວງກວາງຊີ, ສປ ຈີນ, ພາຍໃຕ້ຄຳຂວັນ: “ຮ່ວມກັນສ້າງສາພັດທະນາ ໜຶ່ງແລວ ໜຶ່ງເສັ້ນທາງ ແລະ ຮ່ວມກັນສ້າງເສດຖະກິດດິຈິຕອນ”, ໃນຕອນເຊົ້າຂອງວັນທີ 27 ພະຈິກ 2020 ນີ້.

ໃນບົດຄຳເຫັນເປີດພິທີ, ພະນະທ່ານນາຍົກລັດຖະມົນຕີ ໄດ້ຍົກໃຫ້ເຫັນເຖິງຄວາມໝາຍຄວາມສໍາຄັນຂອງງານວາງສະແດງສິນຄ້າອາຊຽນ-ຈີນ ໃນຄັ້ງນີ້ ແລະ ໄດ້ຕີລາຄາວ່າ ຕະຫຼອດ 17 ຄັ້ງຜ່ານມາງານວາງສະແດງດັ່ງກ່າວ ໄດ້ປະກອບສ່ວນອັນໃຫຍ່ຫຼວງເຂົ້າໃນການສົ່ງເສີມການຄ້າ, ການລົງທຶນ ແລະ ການທ່ອງທ່ຽວ ລະຫວ່າງອາຊຽນ ແລະ ຈີນ ເວົ້າລວມ ແລະ ເວົ້າສະເພາະລະຫວ່າງ ສປປ ລາວ ແລະ ສປ ຈີນ.

ພິເສດ, ງານວາງສະແດງສິນຄ້າອາຊຽນ-ຈີນ ປີນີ້ ແມ່ນຈັດຂຶ້ນໃນທ່າມກາງແຫ່ງຂີດໝາຍໃໝ່ຂອງການພົວພັນຮ່ວມມືຍຸດທະສາດອາຊຽນ-ຈີນ ເຊັ່ນ: ເປັນປີຄົບຮອບ 10 ປີ ຂອງການສ້າງຕັ້ງເຂດການຄ້າເສລີອາຊຽນ-ຈີນ, ປີແຫ່ງການຮ່ວມມືດ້ານເສດຖະກິດດິຈິຕອນອາຊຽນ-ຈີນ, ປີທີ່ອາຊຽນ ແລະ ສປ ຈີນ ກຳລັງຮ່ວມມືກັນຕ້ານ, ຮັບມື ແລະ ແກ້ໄຂຜົນກະທົບຂອງການແຜ່ລະບາດຂອງພະຍາດ ໂຄວິດ-19 ແລະ ຈະໄດ້ພ້ອມກັນຜັນຂະຫຍາຍຜົນຂອງກອງປະຊຸມສຸດຍອດອາຊຽນ-ຈີນ ຄັ້ງທີ 23 ທີ່ຫາກໍ່ສຳເລັດລົງດ້ວຍຜົນອັນຈົບງາມ ທັງມີການຮັບຮອງເອົາປີ 2021 ເປັນປີແຫ່ງການພັດທະນາແບບຍືນຍົງອາຊຽນ-ຈີນ ແລະ ຜັນຂະຫຍາຍສັນຍາການເປັນຄູ່ຮ່ວມເສດຖະກິດຮອບດ້ານຢູ່ລະດັບພາກພື້ນ ຫຼື ອາເຊັບ (RCEP) ໃຫ້ເປັນຮູບປະທໍາ.

ສຳລັບທິດທາງໃນຕໍ່ໜ້າຂອງການຮ່ວມມືອາຊຽນ-ຈີນ, ພະນະທ່ານນາຍົກລັດຖະມົນຕີ ໄດ້ສະເໜີໃຫ້ອາຊຽນ ແລະ ຈີນ ສືບຕໍ່ຜັນຂະຫຍາຍບັນດາແຜນງານ/ໂຄງການ ທີ່ລະບຸຢູ່ໃນແຜນປະຕິບັດການຮ່ວມມືອາຊຽນ-ຈີນ ສະບັບໃໝ່ ໄລຍະ 2021-2025; ເລັ່ງໃສ່ການເຊື່ອມສານເຊິ່ງກັນ ແລະ ກັນ ລະຫວ່າງແຜນແມ່ບົດການເຊື່ອມຈອດອາຊຽນ ຮອດປີ 2025 ຫຼື MPAC 2025 ແລະ ຂໍ້ລິເລີ່ມໜຶ່ງແລວ ໜຶ່ງເສັ້ນທາງ ຊຶ່ງສຳລັບຢູ່ ສປປ ລາວ ກໍ່ແມ່ນການກໍ່ສ້າງທາງລົດໄຟຄວາມໄວສູງລາວ-ຈີນ, ເຊິ່ງຄາດວ່າຈະສຳເລັດຕາມແຜນການທີ່ວາງໄວ້ໃນທ້າຍປີ 2021; ການຫັນໄປສູ່ເສດຖະກິດແບບດິຈິຕອນເທື່ອລະກ້າວໂດຍສະເພາະການຍົກລະດັບຈຸລະວິສາຫະກິດ ແລະ ວິສາຫະກິດຂະໜາດນ້ອຍ-ກາງ (MSMEs) ເພື່ອສາມາດດຳເນີນທຸລະກິດທາງອອນໄລໄດ້; ການແກ້ໄຂຄວາມທຸກຍາກ ດ້ວຍການຍົກລະດັບຄວາມອາດສາມາດໃນການຜະລິດ (Productive on Capacity) ແລະ ການຫັນໄປສູ່ການຜະລິດກະສິກຳທີ່ທັນສະໄໝ (Smart Agriculture); ແລະ ການສົ່ງເສີມການໄປມາຫາສູ່ລະຫວ່າງປະຊາຊົນກັບປະຊາຊົນ ລວມທັງການສົ່ງເສີມການທ່ອງທ່ຽວ.

ຂໍ້ມູນ: ກົມການຂ່າວ, ກະຊວງການຕ່າງປະເທດ

- Advertisement -

Latest news

- Advertisement -

Related news

- Advertisement -

LEAVE A REPLY

Please enter your comment!
Please enter your name here