ເຮືອເຟີຣີ ເກີຍຕື້ນນອກຝັ່ງອິນໂດເນເຊຍດັບ 24 ສົບ

0
24

ສຳນັກຂ່າວຕ່າງປະເທດລາຍງານຈາກແຂວງສຸລາເວສີໃຕ້ປະເທດອິນໂດເນເຊຍເມື່ອວັນທີ່ 3 ກໍລະກົດວ່າ ອຸບັດຕິເຫດເຮືອເຟີຮີຫຼືເຮືອໂດຍສານຂ້າມຟາກແລ່ນເກີຍຕື້ນນອກຊາຍຝັ່ງເກາະເຊລາຢາຣແຂວງສຸລາເວສີໃຕ້ ເມື່ອວັນອັງຄານທີ່ຜ່ານມາ ຊື່ງກໍ່ເປັນມື້ດຽວກັບທີ່ທາງການອິນໂດເນເຊຍປະກາດຢຸດການຄົ້ນຫາຢ່າງເປັນທາງການສຳລັບຜູ້ໂດຍສານກວ່າ 160 ຄົນທີ່ຍັງຄົງສູນຫາຍ ຫຼັງເຮືອເຟີຣີອັບປາງໃນທະເລສາບໂທບາຫນື່ງໃນທະເລສາບປາກປ່ອງພູເຂົາໄຟທີ່ເລິກທີ່ສຸດໃນໂລກ ຕັ້ງຢູ່ເທີງເກາະສຸມາຕາຂອງອິນໂດເນເຊຍ ເມື່ອສອງອາທິດກ່ອນຮູບທີ່ເຜີຍແຜ່ຜ່ານໂຊຊຽວມີເດຍສະແດງໃຫ້ເຫັນວ່າ ຜູ້ໂດຍສານປີນຕິດຂອບຂອງເຮືອເຟີຣີເຄເອັມ ເລສຕາຣີ ຂະນະອ່ຽງໃກ້ຂວຳ່ນອກຊາຍຝັ່ງເກາະເຊລາຢາຣຂອງແຂວງສຸລາເວສີໃຕ້ ຂະນະທີ່ມີຜູ້ໂດຍສານອີກຈຳນວນຫນື່ງລົງໄປລອຍຄໍຢູ່ໃນທະເລລໍຄອຍຄວາມຊ່ວຍເຫຼືອ


ເຮືອເຟີຣີລຳນີ້ແລ່ນເກີຍຕື້ນຫ່າງອອກມາຈາກຊາຍຝັ່ງປະມານ 300 ແມັດ ຕາມລາຍງານຂອງສຳນັກງານການຂົນສົ່ງຂອງອິນໂດເນເຊຍແຕ່ຄື້ນລົມແຮງໃນທະເລໄດ້ພັດເອົາລົດບັນທຸກ ແລະລົດຍົນຫຼາຍຄັນຕົກຈາກເຮືອ


ທ່ານ ຊູໂຕໂປ ເປີຣໂວ ນູໂກຣໂຮ ໂຄສົກສຳນັກງານບໍລິຫານຈັດການພິບັດໄພແຫ່ງອິນໂດເນເຊຍກ່າວວ່າ ເບື້ອງຕົ້ນພົບສົບຜູ້ເສຍຊີວິດແລ້ວ 24 ສົບ ໃນຈຳນວນນີ້ມີເດັກລວມຢູ່ນຳ ແຕ່ກໍ່ມີຜູ້ລອດຊີວິດ 74 ຄົນ ແລະສູນຫາຍ 41 ຄົນ ຜູ້ໂດຍສານບາງຄົນອາດຈະຢູ່ເທີງເຮືອ ເພາະຄື້ນລົມແຮງໃນທະເລເປັນອຸປະສັກຕໍ່ການຊ່ວຍເຫຼືອ ແຕ່ກໍ່ມີເຮືອປະມົງ ແລະເຮືອນ້ອຍອີກຫຼາຍລຳເຂົ້າມາຊ່ວຍເຫຼືອ


ເຮືອເຟີຣີເຄເອັມ ເລສຕາຮີ ຍາວ 48 ແມັດເດີນທາງຈາກເກາະສຸລາເວສີຈະໄປຍັງເກາະເຊເລຢາຣແຕ່ກໍ່ເກີດເຫດແລ່ນເກີຍຕື້ນເພາະຄື້ນລົມແຮງໃນທະເລ ອຸບັດຕິເຫດທາງທະເລເກີດຂື້ນຈົນກາຍເປັນເລື່ອງປົກກະຕິສຳລັບອິນໂດເນເຊຍ ເພາະຄົນສ່ວນໃຫ່ຍຍັງອາໃສການສັນຈອນທາງເຮືອເປັນສຳຄັນ ເພາະສະພາບພູມມິປະເທດເປັນຫມູ່ເກາະຂະຫນາດໃຫ່ຍແລະມີເກາະລວມກັນກວ່າ 17,000 ເກາະ ແຕ່ກໍ່ຍັງຂາດມາດຕະຖານດ້ານຄວາມປອດໄພເປັນສາເຫດສຳຄັນ