ເຈາະເລິກກຸ່ມເອ World Cup 2018

0
25

ສື່ກິລາຕ່າງປະເທດລາຍງານ ໃນວັນທີ 6 ມິຖຸນາ ທີ່ຜ່ານມາວ່າ: ນັບຖອຍຫຼັງອີກພຽງບໍ່ເທົ່າໃດມື້ ກ່ອນທີ່ບານໂລກຈະເລີ່ມຂຶ້ນໃນອາທິດໜ້າແລ້ວ ເຮົາມາເບິ່ງກັນວ່າ ແຕ່ລະສາຍໃຜຈະມີໂອກາດເຂົ້າຮອບຖັດໄປ ແລະ ໃຜຈະຕ້ອງກັບບ້ານຕັ້ງແຕ່ຮອບແບ່ງກຸ່ມ, ເຮົາມາວິເຄາະກັນແບບເຈາະເລິກ ໂດຍມື້ນີ້ເລີ່ມກັນກັບ 4 ທີມ ຈາກກຸ່ມເອກ່ອນເລີຍ.

1. ລັດເຊຍ:

ເປັນເຈົ້າພາບບານໂລກເປັນຄັ້ງທຳອິດ, ສະຕານິສລາບ ເຊີເຊຊອບ ຄູຝຶກອາຍຸ 54 ປີ ຫວັງຈະສ້າງຄວາມປະທັບໃຈໃຫ້ຄົນໃນປະເທດເຕັມທີ່ ຫຼັງຈາກທີ່ຜິດຫວັງມາທັງ ບານໂລກ 2014 ແລະ ບານເຕະເອີຣົບ 2016 ທີ່ຕົກຮອບແບ່ງກຸ່ມທັງສອງທົວນາເມັ້ນ; ແຕ່ຊ່ວງອຸ່ນເຄື່ອງທີ່ຜ່ານມາ, 6 ນັດຫຼ້າສຸດ ລັດເຊຍຍັງບໍ່ສາມາດຊະນະທີມໃດໄດ້ເລີຍ, ເສຍເຖິງ 4 ນັດ ແລະ ສະເໝີອີກ 2 ນັດ. ເບິ່ງແລ້ວຟອມການຫຼິ້ນຂອງລັດເຊຍ ຈະອ່ອນຫຼາຍ ແຕ່ໂຊກດີບານໂລກຄັ້ງນີ້ ຖືກຈັດມາຢູ່ໃນສາຍທີ່ບໍ່ໜັກເທົ່າໃດ.

ໂອກາດເຂົ້າຮອບ 16 ທີມ ຍັງເປີດກວ້າງສຳລັບເຈົ້າພາບ, ຖ້ານັດເປີດສະໜາມສາມາດຊະນະ ອາຣັບບິ ຊາອຸດິດ ໄດ້ ຄວາມໝັ້ນໃຈອາດຈະມີຫຼາຍຂຶ້ນ ເຖິງແມ່ນວ່າຈະຕ້ອງພົບກັບທີມໃຫຍ່ຢ່າງ ອຸຣຸໄກວ ທີ່ຄາດວ່າຈອງທີ 1 ແນ່ນອນໃນກຸ່ມ; ແຕ່ຖ້າສາມາດເກັບອີກສອງທີມທີ່ເຫຼືອໄດ້ ລັດເຊຍກໍມີໂອກາດເຂົ້າຮອບສູງ ໂດຍມີໂອກາດເຂົ້າຮອບຢູ່ທີ່ 50%.

ຕົວເດັ່ນຂອງທີມ: ອາລັນ ຊາໂກເຢບ ນັກເຕະກອງກາງອາຍຸ 27 ປີ ຈາກຊີເອສເອ ມອສໂກ ຈະເຮັດໜ້າທີ່ເປັນຕົວບຸກຂອງທີມ ເຖິງແມ່ນວ່າຟອມການຫຼິ້ນບໍ່ຈະໄດ້ໂດດເດັ່ນຄືຕອນຍັງເປັນດາວລຸ່ງ ແຕ່ມັກຈະມີທີເດັດສະເໝີ, ຮັບໃຊ້ທີມຊາດມາທັງໝົດ 57 ນັດ ແລະ ຍິງໄປ 9 ປະຕູ.

ອີກໍ ອາຄິນເຟເຢບ ຜູ້ຮັກສາປະຕູອາຍຸ 32 ປີ ຂອງລັດເຊຍ, ຮັບໃຊ້ທີມຊາດຫຼາຍກວ່າ 100 ນັດ ເຖິງແມ່ນວ່າໄລຍະຫຼັງຈະຜິດພາດຫຼາຍ ແຕ່ລາວຍັງເປັນສູນລວມຂອງທີມຢູ່ສະເໝີ ແລະ ຈະຮັບໜ້າທີ່ເປັນກັບຕັນທີມໃນບານໂລກຄັ້ງນີ້.

2. ອາຣັບບິ ຊາອຸດິດ:

ໜຶ່ງໃນຕົວແທນຈາກອາຊີ ຈົບອັນດັບສອງຕາມຫຼັງຍີ່ປຸ່ນໃນຮອບຄັດເລືອກ, ອາຣັບບິ ຊາອຸດິດ ຜ່ານເຂົ້າມາບານໂລກເປັນຄັ້ງທີ 5 ແຕ່ຕ້ອງແລກດ້ວຍການປົດຄູຝຶກໄປເຖິງ 2 ຄົນ, ໂດຍໄດ້ ຮວນ ອັນໂຕນິໂອ ປິດຊີ ອະດີດຄູຝຶກຊາວເຈລີ ເຂົ້າມາຮັບໜ້າທີ່ແທນ ເອັດກາໂດ້ ເບົາຊາ ແລ້ວ ໃນໄລຍະເດືອນພະຈິກ ປີຜ່ານມາ ແລະ ຫວັງຈະສ້າງເຊີໄພຣເຂົ້າຮອບໃຫ້ໄດ້ ຫຼັງຈາດເຄີຍເຮັດໄດ້ດີທີ່ສຸດ ຄືຮອບ 16 ທີມ ຕັ້ງແຕ່ປີ 1994, ບໍ່ວ່າຈະຢູ່ສາຍໃດກໍຄືຈະເປັນງານທີ່ໜັກຂອງ ອາຣັບບິ ຊາອຸດິດ ເຖິງຈະກ່າວວ່າເປັນອ່ອນສຸດໃນສາຍ ແຕ່ເຊື່ອວ່າຍັງພໍມີຫວັງໃນການເກັບແຕ້ມຈາກລັດເຊຍ ແລະ ເອຢິບ ເຊິ່ງພວກເຂົາຕ້ອງອາໄສເກມບຸກທີ່ເປັນຈຸດເດັ່ນຕັ້ງແຕ່ຮອບຄັດເລືອກ ໃນການສູ້ກັບສອງທີມນີ້, ໂອກາດເຂົ້າຮອບຂອງທີມມີພຽງ 25%.

ຕົວເດັ່ນຂອງທີມ: ໂມຮາເໝັດ ອັນ-ຊາລາວີ ນັກເຕະອາຍຸ 30 ປີ, ຮັບໃຊ້ທີມຊາດມາກຳລັງຈະຄົບ 40 ນັດ ແລະ ຍິງປະຕູໃນຮອບຄັດເລືອກທີ່ຜ່ານມາເຖິງ 16 ປະຕູ.

3 ເອຢິບ:

ຫຼັງຈາກຫາຍຕົວໄປຢ່າງດົນນານ, ເອຢິບກໍປະກາດການກັບມາບານໂລກຮອບສຸດທ້າຍ ໄດ້ເປັນຄັ້ງທີ 3 ແລະ ນີ້ເປັນການຜ່ານເຂົ້າຮອບບານໂລກຄັ້ງທຳອິດ ນັບຕັ້ບແຕ່ປີ 1990. ໃນຮອບຄັດເລືອກ, ທີມເອຢິບເປັນທີໜຶ່ງຂອງສາຍອີ ໂດຍເສຍພຽງນັດດຽວ. ໜ້າສົນໃຈວ່າ ພວກເຂົາຍັງບໍ່ເຄີຍໄດ້ສຳຜັດໄຊຊະນະໃນບານໂລກຮອບສຸດທ້າຍ ເຊິ່ງຄັ້ງນີ້ເມື່ອຈັບຄູ່ຢູ່ໃນສາຍທີ່ບໍ່ໜັກເທົ່າໃດ ພວກເຂົາຈຶ່ງຖືກເບິ່ງວ່າ ມີໂອກາດທີ່ຈະເກັບແຕ້ມໄດ້ຈາກຫຼາຍໆທີມ ແລະ ມີລຸ້ນເຂົ້າຮອບ 16 ທີມ ຢູ່ທີ່ 40% ໂດຍສະເພາະການມີ ຊາລາ ທີ່ໜ້າຈະເປັນຕົວເດັ່ນໃນເກມບຸກຂອງພວກເຂົາ. ທັ້ງນີ້, ເອກຕໍ ຄູເປ ຄູຝຶກທີມຊາດເອຢິບ ຫວັງຈະໄດ້ສຳຜັດໄຊຊະນະໃນບານໂລກ ເປັນຄັ້ງທຳອິດໃຫ້ໄດ້.

ຕົວເດັ່ນຂອງທີມ: ໂມຮາເໝັດ ຊາລາ ເປັນຕົວຫຼັກຂອງທີມທີ່ຍິງໄປແລ້ວ 5 ປະຕູ ຈາກ 6 ນັດ ເຊິ່ງໜຶ່ງໃນນັ້ນເປັນຈຸດໂທດສຳຄັນ ພາທີມເຂົ້າໄປບານໂລກຮອບສຸດທ້າຍ; ທີ່ໜ້າເປັນຫ່ວງ ຄືອາການບາດເຈັບ ຈະເຮັດໃຫ້ ຊາລາ ພ້ອມແຂ່ງໃນນັດທຳອິດ ຫຼື ບໍ, ແຕ່ເຊື່ອວ່າເມື່ອລາວລົງສະໜາມ ເກມບຸກເອຢິບ ກໍຍິ່ງມີຫວັງເພີ່ມຂຶ້ນໂດຍທັນທີ.

4. ອຸຣຸໄກວ:

ດ້ວຍຟອມການຫຼິ້ນອັນໂດດເດັ່ນ ຈົບອັນດັບສອງ ຕາມຫຼັງເບຼຊິນ ໃນຮອບຄັດເລືອກ, ຜ່ານເຂົ້າມາບານໂລກໄດ້ແບບສະບາຍ ພ້ອມທັງຍິງໄດ້ຫຼາຍທີ່ສຸດເປັນອັນດັບສອງຂອງໂຊນອາເມລິກາໃຕ້ ນຳອີກ, ເຮັດໃຫ້ພວກເຂົາຖືກຍົກໃຫ້ຕົວເຕັງອັນດັບໜຶ່ງຂອງກຸ່ມເອ. ອອສກາ ວໍຊິງຕັນ ຕາບາເຣສ ຈະເປັນຄູຝຶກທີ່ຄຸມທີມຊາດດົນທີ່ສຸດໃນບານໂລກຄັ້ງນີ້ ຫຼັງຈາກທີ່ຄຸມທີມມາຕັ້ງແຕ່ປີ 2006. ແຊັມບານໂລກ 2 ສະໄໝ ຢ່າງ ອຸຣຸໄກວ ສ້າງຊື່ສຽງໃນທັງທາງລົບ ແລະ ທາງບວກ ໃນບານໂລກສອງຄັ້ງທີ່ຜ່ານມາ. ມາຄັ້ງນີ້ຈັບມາຢູ່ໃນສາຍທີ່ບໍ່ຍາກ ຖ້າບໍ່ມີການພິກລັອກໃດໆ ພວກເຂົາໜ້າຈະເກັບແຕ້ມໄດ້ 9 ແຕັມເຕັມ ແລະ ຜ່ານເຂົ້າຮອບ 16 ທີມໄດ້ງ່າຍໆ ໂດຍມີໂອກາດຢູ່ທີ່ 70% ພ້ອມທັງມີລຸ້ນເຂົ້າຮອບຕໍ່ໆໄປອີກ ແນ່ນອນ.

ຕົວເດັ່ນຂອງທີມ: ເອດິສັນ ຄາວານີ ແລະ ຫຼຸຍ ຊົວເຣສ ສອງຄູ່ຫູແນວບຸກຂອງທີມ, ຍິງປະຕູລວມກັນ 15 ປະຕູ ໃນຮອບຄັດເລືອກ ໂດຍ ຄາວານີ ນັກເຕະຂອງສະໂມສອນເປແອສເຊ ທີ່ຍິງຄົນດຽວ 10 ປະຕູ ຄາດວ່າເກມບຸກຈະບໍ່ເປັນສອງຮອງໃຜ ໃນເອີຣົບແນ່ນອນ.