ກອງປະຊຸມເຈົ້າໜ້າທີ່ອາວຸໂສວັດທະນະທຳ-ສັງຄົມອາຊຽນຄັ້ງທີ 21

0
26

ກອງປະຊຸມເຈົ້າໜ້າທີ່ອາວຸໂສວັດທະນະທໍາ-ສັງຄົມອາຊຽນຄັ້ງທີ 21 ໄດ້ໄຂຂຶ້ນໃນວັນທີ 30 ສິງຫານີ້, ທີ່ໂຮງແຮມລາວພລາຊາ, ນະຄອນຫລວງວຽງຈັນ, ໂດຍການເປັນປະທານຂອງທ່ານຫົວໜ້າກົມສື່ມວນຊົນກະຊວງຊວງຖະແຫລງຂ່າວ, ວັດທະນາທໍາ ແລະ ທ່ອງ ທ່ຽວ ປິ່ນປາຖະໜາ ພັນທະມາລີ, ທັງເປັນຫົວໜ້າເຈົ້າໜ້າທີ່ອາວຸໂສວັດທະນະທຳອາຊຽນຂອງ ສ ປປ ລາວ, ມີທ່ານຮອງກອງເລຂາອາຊຽນ ແລະ ຄະນະຜູ້ແທນຈາກ 10 ປະເທດອາຊຽນເຂົ້າຮ່ວມ. ເພື່ອພ້ອມກັນປຶກສາຫາລື ແລະ ທົບທວນຄືນຫລາຍບັນຫາສຳຄັນ, ໂດຍສະເພາະແມ່ນໝາກຜົນຂອງກອງປະຊຸມປະຊາຄົມວັດ ທະນະທຳ-ສັງຄົມອາຊຽນຄັ້ງທີ 15 ແລະ ກອງປະຊຸມເຈົ້າໜ້າທີ່ອາວຸໂສຄັ້ງທີ 20 ທີ່ໄດ້ຈັດຂຶ້ນຢູ່ແຂວງຫລວງພະບາງເມື່ອ
ເດືອນມິຖຸນາ 2016 ຜ່ານມາ,ພ້ອມດຽວກັນຍັງໄດ້ປຶກສາຫາລືການຈັດຕັ້ງປະຕິບັດແຜນແມ່ບົດຂອງປະຊາຄົມວັດທະນະທຳ-ສັງຄົມອາຊຽນ 2025 ແລະ ພິຈາລະນາບັນດາເອກະສານທີ່ຈະນຳສະເໜີຕໍ່ກອງປະຊຸມລັດຖະມົນຕີປະຊາຄົມວັດທະນະທຳ-ສັງຄົມອາຊຽນຄັ້ງທີ 16 ເພື່ອຮັບຮອງເອົາ ແລະ ສະເໜີຕໍ່ບັນດາຜູ້ນຳອາຊຽນໃນກອງປະຊຸມສຸດຍອດອາຊຽນຄັ້ງທີ 28, 29 ທີ່ຈະໄຂຂຶ້ນໃນຕົ້ນເດືອນກັນຍານີ້.

ທ່ານ ປີ່ນປາຖະໜາ ພັນທະມາລີ ໃຫ້ຮູ້ວ່າ: ສໍາລັບປະຊາຄົມວັດທະນາທໍາ-ສັງຄົມອາຊຽນແມ່ນມີ 2 ວຽກທີ່ນອນໃນ 8 ບູລິມະສິດຂອງວິໃສທັດອາຊຽນ ຄື: ການຫັນປ່ຽນຈາກການຈ້າງງານນອກລະບົບໄປສູ່ການຈ້າງງານໃນລະບົບ ເພື່ອກ້າວໄປສູ່ການສົ່ງເສີມວຽກທີ່ຖືກຕ້ອງ ແລະ ເປັນທໍາໃນອາຊຽນ ແລະ ການຊຸກຍູ້ສົ່ງເສີມຮັດແໜ້ນການຮ່ວມມື ແລະ ປົກປັກຮັກສາມໍລະດົກວັດທະນະທໍາອາຊຽນ.